因為知道是主

引言：回流到世界？ 

返得教會比較耐、或者比較鍾意讀聖經嘅弟兄姊妹，會知道《約翰福音》其實喺第二十章嘅結尾，已經可以完㗎嘞。第二十章講完咗「空墳墓」，講完耶穌喺十個門徒匿埋嘅屋裡向佢哋顯現；跟住八日之後，門徒再次聚集時，特登因為多馬上次唔在場，所以又再顯現一次。最後喺第30至31節，經文話：「耶穌在他們面前另外行了許多神蹟，沒有記錄在這書上。但記載這些事是要使你們信耶穌是基督，是上帝的兒子，並且使你們信他，好因着他的名得生命。」值得一提嘅係：「但記載這些事是要使你們信耶穌是基督」呢一句，喺一啲古抄本嘅用字嘅意思，係「使你們〔繼續〕信耶穌是基督」(NRSV “so that you may continue to believe”)， 即係讀者已經係基督徒，而呢卷福音書嘅首要目的，係要堅固信徒嘅信心。 無論如何，卷書可以喺第二十章呢度完結，而且完得相當靚添，係嘛？

(1. 黄漢輝著，《耶穌是道路、真理、生命 - 抗衡世界的門徒生命》，香港：道聲，2021， 頁眉-10。)

(2. 也見 D.A. Carson, The Gospel According to John, PNTC; Accordance electronic ed., Grand Rapids: Eerdmans, 1991, 661-663 就此課題詳盡的討論。Carson 認為書卷的首要目的是向非基督徒傳道，使他們相信耶穌就是基督（彌賽亞）。)

但係峰迴路轉，原來之後仲有多一章，係另一段耶穌向門徒顯現嘅記載。好多聖經學者認為，第二十一章原本就係《約翰福音》嘅一部份，唔係寫好咗，後來再加上去。亦即係話，寫《約翰福音》嘅人，刻意安排有兩段結語（endings），得意嘛？第二十一章呢度所講打魚嘅記載，同二十章所講，耶穌喺復活之後三次顯現，究竟個先後次序應該點樣排列，現代嘅讀者可能好關注，因為我哋慣咗有紋有路、啲嘢一定要按先後次序排列，但呢個似乎並唔係福音書作者嘅關注 - 《約翰福音》嘅作者係按主題去編排經文，而唔係按事情嘅先後次序去編排。所以喺第二十章，描繪嘅係 在唔同嘅場景、由唔同嘅見證人見證，證明耶穌已經復活咗，真係復活，唔係幻覺，復活嘅身體可以穿越時間、空間；而耶穌嘅復活唔止係神蹟，更加係證明咗佢之前所講嘅，係乜嘢？係佢已經按着父上帝嘅心意，用佢嘅死成就咗救恩（「成了」，約十九30）；並且按聖經所講，耶穌必定死而復生（約二十9）。

咁嚟到第二十一章，主題係乜呢？場景一轉，鏡頭影住七個門徒，佢哋喺耶穌被埋葬之後，失去咗人生方向。佢哋曾經將所有嘅希望都係放喺耶穌身上，在耶穌被釘十字架之前嘅幾年，佢哋放低咗自己嘅工作，跟隨着耶穌，人生嘅目標係想見到天國降臨，佢哋聽到耶穌宣講嘅信息，係關於天國是怎樣怎樣；不過聽還聽，門徒以為天國就即係以色國在地上復國，以為彌賽亞就係上帝差派嚟嘅君王。結果…. 彌賽亞（即係拯救者）耶穌竟然死咗，成為咗一具屍體；雖然耶穌的確好清楚曾經向佢哋講過佢會喺耶路撒冷死，但好明顯，門徒聽唔入耳，選擇式聆聽福音，選擇啱聽嘅解釋。而現在，佢哋要面對耶穌嘅死亡。曾幾何時，佢哋心裡火熱，一直盼望以色列復興，耶穌被三千、五千個 fans 圍住、追住要聽佢講道嘅景象，睇見耶穌行嘅神蹟同異能，鬼都怕咗佢～ 耶穌甚至令佢哋（呢班門徒）可以行神蹟醫治、趕鬼… 呢種種好振奮、好有力量、好有把握、好有型嘅經歷，變成咗一個冰冷死寂嘅景象：耶穌 死咗，佢嘅墓穴被一塊大石封住咗，外面有羅馬兵看守。而好有可能，呢班門徒被猶太公議會嘅人驅趕、跟蹤，甚至搜捕。我估計因為咁嘅原因，佢哋必須離開耶路撒冷，向北邊走，所以去到提比哩亞海（即係加利利海）。由充滿盼望到再無盼望，呢種種反差，大概解釋到，點解佢哋沉晒，頹到一個點。

《約翰福音》第二十一章，就係喺呢種「頹」嘅氛圍下，描述呢班門徒點樣由失去信心同盼望，打算「回流」返去重操故業、搵食，「天咩國吖，天國可以當飯食咩…」，即係正所謂「好心你幾廿歲人唔好咁多幻想啦」。由失去信心同盼望，到因為復活嘅耶穌顯現喺門徒面前，重新 用愛去同上帝連結。留意我嘅用字，唔係門徒發憤圖強，而係耶穌主動讓佢哋見到，重建佢哋嘅信仰生命，重建同上帝嘅關係，重新行番上跟隨耶穌嘅道路。

我哋去睇吓今日嘅經文，同今日嘅我哋，究竟有乜嘢關聯？

釋經與反省

第4-6節講到，門徒由打唔到魚，到聽到呢位陌生人（佢哋認唔出係耶穌）嘅指引，網咗一大網魚上嚟嘅時候，就立即認出，岸上嘅係耶穌。大家自然就會問：點解嗰位「耶穌所愛的那門徒」會因為呢個景象，認出岸上面嗰位係耶穌？熟讀聖經嘅弟兄姊妹，自然知道《路加福音》五章4-11節，記載咗耶穌呼召彼特、雅各、約翰呢啲門徒嘅時候，其實曾經施行過類似嘅神蹟。雖然技術上，《約翰福音》無記載呢一段，但都幾明顯，《約翰福音》嘅作者估計讀者知道呢一件事，假設讀者睇得明，所以無特別再加上解釋。

然後，經文記載，耶穌喺岸上面，已經起好咗個火， BBQ，燒緊魚同餅。門徒嚟到，見到復活咗嘅耶穌，有咩反應？唔係歡呼擁抱，亦都似乎無講Hallelujah（至少無記載寫落嚟），門徒個反應係咩呢？門徒嘅反應係：無乜反應；應該話，唔知點樣反應。門徒毫無疑問相信面前呢一位，係已經復活咗嘅耶穌。經文喺第12節有一句好有意思的說話，我今日嘅講題都係取材自呢句說話：「因為他們知道他是主」。

「因為他們知道他是主」，呢句說話其實可圈可點 - 按字面去睇，佢哋知道呢位就係耶穌，即係證明耶穌已經復活咗；但更進一步嘅意思係，呢位曾經喺佢哋生命裏面唯一嘅意義同盼望嘅耶穌，其實仍然係佢哋嘅「主」，但係之前，剛剛之前，佢哋諗緊乜呢？佢哋諗緊：耶穌都唔喺度囉，返去搵食啦，大家都總要生活㗎；生命嘅「主」，人生嘅嘢，咪就係好好活下來，搵食囉，唔係咩？

所以，當耶穌超乎佢哋想像咁樣，出現喺門徒嘅面前，我估佢哋真係hang咗機，佢哋唔知點樣反應好，因為佢哋清楚知道，耶穌知道佢哋個心諗緊乜 - 佢哋曾經以為耶穌唔會復活；佢曾經以為放低門徒嘅身份同使命，無所謂啦，呢啲嘢都唔緊要喇；佢哋曾經以為跟隨耶穌，只係人生裏面其中一個階段，放完煙花燦爛之後，就歸回生活同生存。面對着復活嘅耶穌，好平靜咁樣同佢哋講，第12節：「你們來吃早飯。」就好似過去幾年，佢哋可能朝朝早都聽見嘅一句說話，佢哋發現，原來耶穌一直都無離開過。門徒發現，離開嘅，原來只係自己嘅心。所以，經文話：「門徒中沒有一個敢問他：「你是誰？」」（二十一12） 

就喺之前，第5節話，耶穌問佢哋：「孩子們！你們有吃的沒有？」門徒都答「沒有。」而第13節，經文話「耶穌走過來，拿餅給他們，也照樣拿魚給他們」，門徒需要嘅，耶穌已經預備。「五餅二魚」神蹟嘅景象，大概門徒仍然清楚記得。呢一刻，如果你係門徒當中嘅一位（當然，我哋今天都係門徒），你估你會諗緊乜？

如果係我，我會諗：耶穌已經復活咗，但似乎唔會留喺地上好耐，似乎佢唔係想住我哋就咁走返去打魚就算。我會好想知，點樣可以喺耶穌睇落去似乎唔係呢個世界上嘅時候，仍然可以跟隨佢。

由呢度，我認為經文可以帶俾我哋有兩點反省：

反省（一）：「我打魚去。」

正如剛才所講，為咗逃避逼迫，門徒過住唔相信耶穌會復活嘅人生 - 第二十章話俾我哋聽，佢哋會喺晚上將自己鎖喺屋裏面，大概係「蛇咬都唔開門呀」嗰隻，因為佢哋認為嗰度係安全嘅地方，安全嘅保障；然後，向北方遠行，返去提比哩亞海，放低門徒嘅身份、福音嘅使命，重操故業。其實都正常嘅，彼得有家室，唔使食咩？

聖經沒有寫下，到底咁樣嘅日子，佢哋過咗幾耐。我哋只係知道，第4節話：當耶穌做喺岸邊嘅時候，「門徒卻不知道他是耶穌」，甚至同耶穌傾咗幾句之後，佢哋都仲未認出耶穌。有人會猜測，會唔會係復活之後嘅耶穌，變咗樣，所以佢哋唔認得呢？當然有咁嘅可能，但亦有可能係：雖然彼得見證過墳墓係空嘅，但佢哋一直未見過復活嘅耶穌；咁樣打魚嘅生活，佢哋已經過咗一段日子，所以心裏面已經覺得，耶穌唔會再出現。門徒唔知道，原來復活嘅耶穌，一直都係與佢哋同在，只係無顯現出來。

親愛的弟兄姊妹們，喺我哋當中，固然有從小在蘇格蘭長大的，但也有不少，係近幾年由不同地方「搬」過嚟（即係移民、移居）蘇格蘭。大概喺搬過嚟之前，對大多數人嚟講，英國唔係我哋熟悉嘅地方；甚至可能直到今日，喺語言、文化、人際相處等等各方面，仍然有好多方面需要學習，需要適應。好多人都係同埋屋企人過嚟， 而除非經濟實力雄厚，否則都係要諗點樣搵食，維持生計。喺大家原本居住嘅地方，可能好多弟兄姊妹都係教會裏面嘅管理層，執事、長老、傳道同工；嚟到呢度，要適應環境，要頂住頭家，其實已經消耗咗好多體力、心力、腦力，仲要諗吓點樣令屋企人喺新嘅地方，覺得適應，覺得開心同幸福。係咁嘅環境之下，大家好難再好似以前咁樣，瞓身去事奉，花心思去傳福音、搞聚會。唔容易呀，係咪？

有時就算肯參與事奉，亦可能吃力不討好，無乜成果見到。不過我覺得，要彼此提醒嘅係，就算係咁，我哋都唔可以淨係掛住「我打魚去」，我哋要喺一個新嘅環境裏邊，去問一個老問題：究竟「跟隨耶穌」係今時今日呢個處境之下，係咩嘢意思？我哋相信耶穌已經復活咗，我哋都相信，呢位復活咗嘅耶穌，今日，喺蘇格蘭呢一度，仍然同我哋教會群體同在。我哋關心生活，耶穌同樣關心我哋：「孩子們！你們有吃的沒有？」我相信，其實耶穌有為我哋預備餅同魚，預備生活所需，問題係：我哋認唔認得出，佢已經係與我哋同在?

因為知道是主，所以我哋留心，繼續過「作門徒」嘅生活，而唔係單係做搵食打魚嘅漁夫。

反省（二）：「主啊，是的，你知道我愛你」

其實，彼得同其他幾位門徒一樣，曾經為耶穌努力過。不過喺《約翰福音》裏面，門徒主要有兩大誤解，或者可以叫做唔明白：第一，門徒唔明白彌賽亞耶穌係用咩方式去拯救世界，所以彼得叫耶穌千萬唔可以去死；第二，原來跟從耶穌，除咗有風光嘅時候，有權能彰顯嘅時候，亦都有付代價，居無定所嘅時候，甚至因為逼迫，因為困境，有失去勇氣和方向嘅時候。

弟兄姊妹們，喺歡欣裏，風光裏嘅時間，喺事業有成、去到邊度都有人尊重、有人多謝你、感激你嘅時間，要講「感謝主！」「耶穌與我同在」呢啲說話，好容易；但係喺事情唔係咁順利，變化不似預期，經濟面對困境，身體狀況唔理想，由俾人哋尊重變做由低做起，從前人哋特登走嚟向我哋請教問意見，同依家可能要清楚表達溝通，有時都有啲困難，我哋會唔會問：耶穌重喺唔喺度？耶穌點解唔符合我哋嘅期望？會唔會好似從前嘅彼得一樣，對耶穌充滿著誤解 – 彼得曾經以為耶穌嘅拯救，係幫以色列人復國；今日，我哋會唔會以為耶穌要作嘅工，就係使人豐衣足食，為人預備153條魚？對於作門徒要付代價，呢個代價包括埋：當表面上，耶穌好似唔喺度嘅時候（好似啫），我哋仍然係帶着使命，過跟隨耶穌嘅生活，我哋預備好付代價、背十架未呢？

信耶穌唔係攞完本天國嘅 Passport，就回流去世界，信耶穌係一種同上帝連結嘅關係，正如在《約翰福音》第十五章，耶穌話好似葡萄樹與枝子連結嘅關係。約十六33 耶穌話門徒在世上係有苦難嘅，但門徒要有勇氣，因為耶穌已經勝過世界。作主門徒，活在世上，係活在張力之中，世界唔接受耶穌，亦都會拒絕跟隨耶穌嘅我哋（約十五18-19）。 門徒唔一定活喺美好嘅生活條件裡面，但門徒有耶穌嘅同在，知道自己在世上係過跟隨耶穌嘅生活，就會明白耶穌說他已經「勝過世界」嘅意思。

總結：在世而不屬世，跟隨耶穌

大家可能會問：咁跟隨耶穌，即係要做啲乜？乜嘢叫做「作主門徒」係一個宏大嘅課題，今日只係講其中一點：約十10耶穌宣講佢嘅使命：「…我來了，是要羊得生命，並且得的更豐盛。」我們很多時認為基督徒的生命就是領受「召命」，而「召命」就一定是要在指定地點，做點甚麼，取得成果；咁，難怪不少基督徒總是以為信耶穌、做好信徒就是在教會「返多一份工」。當然我不是說信徒不要事奉 – 誠然，我們應當事奉。我是說，耶穌是來召我們得豐盛的生命，而不是只召我們去做事工，更不是召我們去「跑數」：「嗱，下次記得，要網到超過153條魚回來～」 - 那不是召命，是 KPI , 是跑數指標吧？耶穌係要讓我哋得到豐盛的生命，即係

- 認識耶穌就是為羊/人捨命的好牧人，

- ⁠明白耶穌對我們的愛，然後

- ⁠回應耶穌的愛，無論環境如何，跟隨祂，這就是回應呼召。

至於要做點甚麼，做多少，在教會、職場、學校、家庭還是甚麼環境去做，是在決定跟隨耶穌之後，自自然然會去思想、會去行動、主會告訴我們的東西，不用太費心。相反，如果只掛著要做點甚麼，要符合目標與數字，不一定是正在跟隨耶穌。耶穌想要嘅，係我哋對佢呢個問題嘅回覆：「你愛我嗎？」

願上帝藉住佢個話語 賜福俾大家。阿們。