我在這裏，但請差遣佢哋

經文 ： 《以賽亞書》六章1-8節

引言：

剛才所讀嘅一段，出自 《以賽亞書》第六章，通常喺聖經個標題係「以賽亞蒙召」。全章其實有13節，不過因為時間嘅緣故，我只係讀出頭8節。但喺解經嘅時候，後邊嗰五節係唔應該分開嘅。如果大家手上有聖經，你會知道，第六章係講緊 當時大衛嘅王國早已一分為二，十二支派分成兩邊，十個支派組成北國以色列，南國猶大就由猶大同便雅憫兩個支派組成。南國猶大嘅烏西雅王執政咗五十二年，即係由16歲做到68歲駕崩。喺猶大國嘅歷史裡面，比起其他王帝，烏西雅王絕對係一個好王帝。參考一下《歷代志》二十六章4-5節咁樣講：「 烏西雅行耶和華眼中看為正的事，效法他父親亞瑪謝一切所行的。 …烏西雅定意尋求上帝；烏西雅尋求耶和華的日子，上帝使他亨通。」

不過王帝都係人，無論做得幾好，都有逝世嘅一日。但猶大國經過咗因為烏西雅統治所帶來嘅 半個世紀嘅富強同繁榮，突然失去一個敬虔又管治能力超班嘅王帝。而在此同時，勢力龐大嘅亞述帝國中興，大約在公元前745年，即係烏西雅王死之前三年，亞述出咗一位雄才偉略嘅君王 - 提革拉毘列色三世，正準備好帶兵，掃平與降服附近所有嘅小國與帝國。

喺咁嘅局勢下，如果你係當時嘅猶大國民，你會點諗？梗係人心惶惶喇；點解？怕打仗喔，隨時打到嚟嘛，當時又無飛機，打到嚟時，走唔切嗰喎～

如果大家熟聖經嘅，會知道《以賽亞書》第七至八章，係講緊先知以賽亞所身處嘅南國猶大，到烏西雅王嘅孫 亞哈斯做王帝嘅時候，北國以色列連同旁邊嘅亞蘭聯手，一齊攻打南國猶大。原因係，猶大一直拒絕加入佢哋對抗亞述呢個聯盟，所以以色列同埋亞蘭為咗避免喺背叛亞述嘅時候，猶大做「鬼頭仔」，從南方起兵，夾埋北方亞述，將以色列同亞蘭前後夾攻，所以先下手為強。其實，佢哋是但一個國家，都已經足夠威脅猶大嘅安危；現在兩個國家一同聯手，基本上猶大只有等死。

今日我哋所讀嘅第六章，以賽亞見異象、領受差遣嘅經歷，其實應該係「以賽亞事奉回憶錄」的其中一段，喺先知晚年時寫成；或者視為一個倒序，係從晚年嘅以賽亞嘅角度，回想到昔日佢喺聖殿裏面，領受上帝嘅異象同埋呼召，然後經過咗幾十年，係猶大國不斷衰落時，一步一步，艱辛咁樣實踐佢所領受嘅使命。

當晚年嘅以賽亞，再想起呢一個在聖殿中領受嘅召命時，對佢自己，對寫成《以賽亞書》時候嘅以色列人，以至於對於今日我哋，究竟有乜嘢意義呢？

反省（一）：烏西雅王崩？主在寶座上

首先，大家有無留意到，先知以賽亞喺邊度見到異象？對，喺聖殿。咁，點解佢會出現喺聖殿呢？呢一點，經文無直接講，但係我哋可以估 - 可能因為烏西雅王駕崩，所以先知為到佢嘅國家 同埋同胞、百姓嘅事情擔心，所以嚟到聖殿禱告。

咁喺聖殿呢個異象裡面，經文話佢見到有撒拉弗。一般嚟講，在聖殿裏便會唔會有郁緊嘅撒拉弗呢？我估無啩～ 所以，呢個被稱為異象；喺呢個異象裡面，以賽亞見到天上嘅景象，上帝坐喺天庭嘅寶座上。呢個亦都表達咗先知嘅角色：佢係同時間連繫住天與地兩個嘅場景：既喺聖殿裏邊事奉、住喺人群當中，亦從上帝處領受信息，了解上帝嘅心意，將呢啲信息傳達俾佢身邊嘅人群。今天，呢個角色，係由邊啲人去擔任？牧師傳道人？唔止～ 其實，每一個信徒，都有呢個使命，用言語同行動去見證福音，將上帝嘅心意，傳達比身邊每一個人。

返嚟經文 - 通常我哋認為撒拉弗係「天使」。有學者根據原文嘅用字（「撒拉弗」的意思是燒著的），認為撒拉弗其實同 民二十一6、申八15所提及嘅「火蛇」有關。但喺《以賽亞書》呢度嘅場景係天庭，唔係獻祭壇喎 - 如果喺獻祭壇附近有兩條火蛇，咁就唔難理解呀，仲好方便添，方便點火～ - 但呢度嘅場景係天上嘅宮廷，所以我會覺得撒拉弗比較似「神獸」，因為根據近東嘅文化，通常王帝嘅王座兩邊嘅扶手同埋腳凳，會雕刻做一啲既有翅膀又有猛獸臉孔嘅浮雕，因為喺當時，君王往往被視為天神降世，又或者係天神收納嘅後裔，所以佢哋能夠掌管大地，包括控制一切天上地下嘅猛獸。而君王坐馬車外出時，車輛兩旁亦都好有可能會有呢啲猛獸嘅裝飾。

咁點解撒拉弗會彼此唱頌「聖哉！聖哉！聖哉！萬軍之耶和華；他的榮光遍滿全地！」？用在聖殿獻祭嘅事情上，「聖」表示係分別出嚟，屬於上帝；而有關於上帝自己嘅，「聖」有著同呢個世界區隔出嚟、不屬於人間、只屬於上帝嘅範圍。「聖哉！」係對上帝嘅頌讚，因為上帝配得頌讚;而「聖哉」嘅對象係「萬軍之耶和華」。「萬軍之耶和華」係一個軍事稱謂，好可能係同嗰陣嘅歷史處境息息相關 - 北國的耶羅波安二世和南國的烏西雅王，在十年裏面先後駕崩（753 & 742 BCE?) ，南北兩國差不多在同時間失去治國已久嘅政治領袖，而隔離個大國亞述，就出咗一個君王 - 軍事強人提革拉毘列色三世。

就係呢個時候，先知以賽亞在異象中，看見「萬軍之耶和華」在耶路撒冷嘅聖殿裏面，亦係喺天庭裏，坐喺寶座上邊。呢個異象代表着掌管全地，最強勢的君王，係主上帝，而不是地上任何君王。原來上帝唔係大家幻想出嚟，亦唔係只係喺聖殿裏面、好似神廟裏面嘅神明咁樣，俾人參拜。我哋嘅上帝係活嘅上帝，佢參與喺人間。當世人睇見世上嘅狀況，覺得人心惶惶，甚至冇乜盼望，上帝仍然在掌管，有佢嘅計劃。

「他的榮光遍滿全地！」在舊約裡，當上帝的榮光充滿一個地方，代表上帝在該處顯現，表達出上帝的臨在與同在。「臨在」與「同在」有點分別，可以話，「臨在」是居高臨下，降到人世，有點睥睨眾生但又掌管大地的味道；「同在」則著重與人同行，讓人不感到孤單的意思。上帝的榮光充滿耶路撒冷的聖殿，同時間顯出上帝的臨在與同在，就好比從前耶和華在西乃山上，向出埃及嘅以色列人顯現。上帝向先知以賽亞顯現，表示即使烏西雅王已經逝世，又有乜好擔心呢？真正令人擔心嘅，係呢個地方、猶大國嘅子民，究竟認唔認識同佢哋有立約關係嘅上帝？究竟係唔係聽從呢位上帝？

弟兄姊妹們，今天，對我哋嚟講，無論係喺個人嘅處境，定係我哋睇見呢個地方、呢個世界嘅現況，有無一啲嘢係令你覺得，好似一向所倚靠嘅東西，突然間失去咗，好多個變化令你覺得前路茫茫，甚至疑惑 究竟係今天，作為基督徒，應該保持一個點樣嘅生活態度去面對將來？間中我都會諗，今天，我哋作為基督徒，除咗返崇拜同教會聚會，同埋借有謝飯禱告之外，其實我哋心裏面所掛住嘅，我哋所追求嘅，同未信嘅朋友有咩分別？「聖哉！聖哉！聖哉！」係我哋對上帝嘅讚美，但係我哋自己又有無分別為聖，歸於上帝呢？我哋會唔會好似昔日嘅猶大人一樣，只見到烏西雅王呢個靠山倒下，但睇唔到一直掌管萬有、看顧我哋嘅，原來係上帝？

反省（二）：「請差遣我！」咁要預備喇 

上帝願意「臨在」與「同在」啫，唔代表我哋已經預備好去迎見佢。喺《以賽亞書》呢一段，一方面，係用咗上帝臨在顯現（theophany) 嘅景象，有可能係仿照出埃及時候喺西乃山，上帝向摩西及以色列民顯現嘅景象，例如 出十九16: 「到了第三天早晨，山上有雷轟、閃電和密雲，並且角聲非常響亮，營下的百姓盡都顫抖」。留意：當時上帝點樣吩咐摩西？第21節：「你下去警告百姓，免得他們闖過來看耶和華，就會有許多人死亡。」即係，根據古代以色列人嘅理解，人如果未曾預備好自己，就與聖潔嘅上帝相遇嘅話，係無辦法係上帝面前存在，只有死亡！

事實上，去到頒布十誡之後，班百姓同摩西講：「請你向我們說話，我們必聽；不要讓上帝向我們說話，免得我們死亡。」（出二十19）後來，整好咗會幕之後，雲彩與榮光充滿其中，出四十34:「雲彩遮蓋會幕，耶和華的榮光充滿了帳幕」 代表咗上帝嚟到以色列人當中。

將呢啲經文傳統比較一下 以賽亞蒙召呢一段經文，我哋可以合理咁推斷，呢段係仿照剛才所講出埃及記嘅經文；就算唔係，至少可以話，古代嘅讀者應該會知道在西乃山上雷轟電閃，與及雲彩遮蓋會幕呢兩段。所以，先知以賽亞 見到上帝臨在喺聖殿裏面，第一個反應就係「禍哉！我滅亡了！」其實係一個好「標準」嘅反應。

喺出埃及記二十章20節，摩西對百姓說：「不要害怕；因為上帝降臨是要考驗你們，要你們敬畏他，不致犯罪。」好清楚，上帝降臨唔係要整死佢嘅子民，而係要讓佢哋去學習去敬畏上帝。當上帝願意臨在人間，與人同在，而人又有心去親近佢、服侍佢，就必須要先了解自己係一個罪人，自己不配去親近同服侍上帝。而就算人願意去敬畏上帝，唔想犯罪，但正如以賽亞所講，佢係「嘴唇不潔的人，住在嘴唇不潔的民中」，人住喺一個罪世人間裏面，實在無辦法憑自己嘅能力去變成聖潔，以至於配得去親近同服侍上帝。如果唔係上帝親自揀選、潔淨我哋，無一個人有資格去服侍佢。

所以，能夠有機會去事奉上帝，唔係奉旨，唔係無可奈何嘅責任，而係恩典。要領受呢一份恩典，我哋需要預備自己，既係需要有心、有實踐去預備，同時間亦都係去靜候上主嘅帶領，甘心讓上帝去預備我哋，離棄不潔淨嘅東西。

諗深一層：上帝點解要咁大費周章，讓以賽亞看到異象，令以賽亞確信耶和華仍坐著為王，喺人看來危急的處境中，堅固以賽亞嘅信心？為何要讓以賽亞知道自己已得上帝的潔淨和接納，讓佢知道自己已經預備好，並且甘心情願去實踐召命？駛唔駛咁複雜呀？原來要嘅，因為呼召的內容，其實在第9至13節，唔係關於列國中的大事或國際局勢，而是關於以賽亞傳講嘅對象，就係喺佢身邊嘅同胞、猶大國內的百姓，係一班恆常拒絕上帝的刁民。原來以賽亞所領受嘅呼召，終極挑戰並唔係去預備自己及面對自己，而係要預備心志，長期去服侍一班唔欣賞自己，甚至乎拒絕上帝話語、「啋你都傻」但自稱係「上帝嘅子民」嘅人。所以，大家就明白點解上帝要安排以賽亞經歷聖殿裡嘅異象、確定自己作為先知嘅身份和使命。

親愛嘅弟兄姊妹，今天，喺呢個地方，當然各人嘅處境不同。無論你覺得係太平盛世、歲月靜好，抑或覺得好似烏西雅王駕崩咁樣，驚濤駭浪，我哋都係敬拜同一位上帝，以同一位耶穌作為我哋嘅救主、基督、君王。我哋有著同一樣嘅目標：愛上帝，同時愛人如己。無論喺咩處境之下，我哋都要睇重作為基督徒嘅身份和使命，基督徒嘅生命唔係只關於搵夠兩餐，亦要花時間同心思，去反省自己，預備自己，領受上帝嘅差遣，走入人群去見證福音。希望當上帝呼召我哋時，我哋係準備好回應：「我在這裏，請差遣我！」 而唔係「我在這裏，但請差遣佢哋！」

求主加力，加添我哋力量與心志。阿們。